17.08.2023ж. күні Кең Жылой ұлттық ат спорты федерациясының ұйымдастыруымен 17.09.2023ж күні Жамбыл облысы, Қордай ауданында Қазақстанда туылған қолтума бәйге аттарының арасында өтетін ҚР чемпионатына Атырау облысы бойынша іріктеу бәйгесі болып өтті. Бәйге өте жоғары деңгейде болды. Әр бәйгеден 1,2,3,4,5 - ші орын алған сәйгүліктеріміз ҚР чемпионатына жолдама ұтып алды. Тай бәйгенің көшін бастап Қызылқоға ауданы, Сағыз ауылының жүйрігі Бисенов Айболаттың иелігіндегі Жайнар атты тұлпар алдына қара салмады. Бәйге басталғаннан Жылой ауданының Тәжиев Серіктің иелігіндегі Мисс атты тұлпар екеуі топтан дара шықты. Тек соңғы айналымда ғана Жайнардың жұлдызы жанып, 8 минут 20 секундта мәреге дара кірді. Екінші орын Мисске бұйырса үшінші орынды Жылой ауданының жүйрігі Жұмбақ еншіледі.

12 шақырым, 4 айналымға созылған құнан бәйге де тартысты өтті. Мәреге келген 3 құнан да жарыстың басынан бастап соңына дейін бірге жарысып келді. Тек соңғы айналымда Қызылқоға ауданының Аспархан атты тұлпары аз ғана басымдықпен мәреге бірінші кірді. Екінші болып Сағыз ауылының Көзайым атты жүйрігі құйрық тістесіп мәреге кірді. Жүлделі үшінші орын Махамбет ауданының жүйрігі Ханторыға бұйырды.

Топ бәйгеге келетін болсақ бәйге басталғаннан Жылой ауданының Қаршыға атты жүйрігі топтан бөлініп бір айналым бойы дара шапты. Тек 1-ші айналым бітіп 2-ші айналымға кеткенде Сағыз ауылының жүйрігі Тауасар алға шықты. Бәйге біткенше Тауасар маңына жылқы жолатпады. Топтан 200-300 метрдей алда болды. Көпшіліктің болжағанындай осы Тауасар мәреден оқ бойы озық келіп, өзінің бабы мен бағы қатар шауып тұрған жануар екенін көрсетті. Екінші болып мәре сызығын Жылой ауданының жүйрігі Мейірім кессе, үшінші болып бірінші айналымда топ жарған Қаршыға атты тұлпар кесті.

Жүлделі орын алған тұлпарларымызды алдағы Жамбыл облысында болатын ҚР чемпионатына сәттілік тілейміз! Аяқтары талмай облысымыздың намысын жоғары дәрежеде қорғап келулеріне тілектеспіз!

Атырау облысы " Бәйге" федерация ұжымы.
17.08.2023. Құлсары қаласы.